خالد الغالي ( قصة معنى الصداقــه )

[M o P t K e R]

لن أتكلم وأدع لكم القصة لكم



والان أخليكم مع صاحب القصه
/ ..بنـدر../
و
.. صديقه الغاالي خـالد..
~10 أجزاء~

بـنـدر : اخواني الاعـزاء تحيه من القلب وبعد...

الـصداقه من اقـوى العلاقات الانسانيه...

علاقه يميزها انها تجمع عدة مشاعر واحاسيس في اطارهـا مثل المحبه .. التضحيه.. وغيرهـا

يمكن اغلبنـا او يمكن كلنـا حصلت له مواقف مع اصدقـاءه منها الحلو ومنها المـر,,منها اللي تقوي العلاقه ,,ومنها اللي تنهيـها

قصتـي تتكلم عن هالموضوع
تقدرون تقولون انها تحمل مشاااعـر اكثر منها احداث

لكني قررت بعد تفكيـر طويـل اني اعرضهـا للناس على شان يستفيدون منها

,,,

احنـا كمجتمع للرجال حدود الصداقـه غالبا معروفه عندنا واغلبهـا تكون للونـاسه والمصلحه..

انـا ما اقول الكل بس اكثرها لكن اللي صار معي شي ثاني وهذي قصتي...

• 1 •

,,في عـام1408هـ

كنا تونـا منتقليـن لـمدينه الرياض

والدراسـه بدت من اسبوعين تقريبا
كنت في سنه رابـع ابتدائي

دخلت فصلي الجديـد و سوا الاستاذ تعـارف بسيط بيني وبين الطـلاب

لما جت وقت الفسحه طلع الجميع الا أنـا

دخـل ولد اسمراني شعره حوسه واسنانه الاربع الاماميه اللي متكسر واللي طايح
مشمر اكمامه
ووجهه كله مخوش وحالته لله
الا انه رغم كل هالبلاوي فيه شيء يخليها مو باينه!!..

قعد يحوس في شنطته سااعه وكل دقيقه يطلـع خرابيط وكل شوي يرفع عينه عندي
واخيرا طلع منهـا نبيطه

وقبل لا يطلع التفـت علي وكان من النوع الي كنـه بينطحك
وهو يطالع
منزل راسه شوي ومعبـس طول الوقت بس كانت نظراته
بريئه اكثر من ان تكون مرعبه!!

وقال بلدغه طفوليه سببها واضح وهو اسنانه اللي حالتها صعبه

الولد : انت الحين ليش جالس لحالك؟

..كانت هذي اول جمله سمعتها من الانسان اللي صار بعد كذا أغلى البشر على قلبي

كان معروف عني اني انطوائي ومنعزل هذي طبيعتي حتى اني اتوتر لما يكلمني احد ما اعرفه .

أنـا : بس ..كذا انا ما ابي اطلع!!
وبعدين انا ما اعرف احد هنا...

و بنفس النظرات اللي والله اعلم انها كانت عاده عنده...

الولد_خالد_ : تعال معي وانا اعرفك على نص اللي فالمدرسه...

كان يجرني من يدي وانا اسحبها بخوف...
لا لا انا كذا مرتاح قلت لك ما ابي اطلع...

لكن الولد اصر لين طلعني معه بالغصب
وزي ما قال عرفني على نص المدرسه تقريبا لكن تبون الصدق حسيت اني تعلقت فيه هو أكثر!!
يمكن عشان شخصيته عكسي تماما اجتماعي , خفيف دم والكل يحبه ويحاول يتقرب منه صحيح انه كان شيطاني ومشاغب لكنه ماكان يتعدى على احـد !

,,حسيت اني مبهور بشخصيته ورغم انـه ذكي جداً الا انه فالدراسه ما كان بالحيل
بـس كان يعرف يمشي عمره من يومه صغير

وعلى كثر الأولاد اللي يعرفهم الا انه بعد تعلـق فيـني فووق ما تتصورون
صرنـا ما نتفارق ابد ولا يشوفون واحد فينا بدون الثاني

.....

مرت السنوات وصداقتي تزداد قوتها مع خالد

..مرت علينا سنين الطفوله والمراهقه وحنا سوى ودخلنا الجامعه وتخرجنا
وحنا ما عمرنا تفارقنا
حتى في السفر ما اذكر ان واحد سافر بدون الثاني الا اذا كانت السفره مع الاهل
اغلب الناس اللي يعرفونـا يحاولون ياخذونا قدوه و كثيـر منهم يضربون المثل في صداقتنا

يمكن تتسآءلون وش سر هالصداقه العميقه؟!!

شي واحد كنا نطبقه بدون مـا نحس من يوم حنا صغار
شي عجزت اغلب الناس انـها تفهمه في تعاملها مع بعض وهو ان كل واحد فينا كان متقبل الثاني بكل ما فيه من العيـوب ولا عمر واحد فينـا حاول يغير الثاني ويمشيه على طريقته برغم الأختلاف الكبير بينا..

/خالد/ كان فيلسـوف بالفطره بسبب علاقاته الكثيره

وكنت اتعلم منه كثير
لما اسأله كيف يقدر يجمع كل هالناس حوله كان يقول كلمات بسيطه لكن تركت فيني اثر كبيـر

كان يقول ::
,,, اسمع يابندر الناس لها مشاكلـها وكـل واحـد فهالدنيـا صدقني منشغـل في نفسـه
ولا احـد تهمـه مشـاكلك
فـاذا تـبي النـاس يحبونـك انسـى نفسـك
وفكـر فيـهم وكيـف تساعدهـم
في حياتهم بقد مـاتقدر,,,


قصتي الاساسيه اللي ابيها توصل لكم
مو في كيفية صداقتنا
لأني مهما شرحت ماراح اقدر أوصـل لـكم مدى عمقهـا
لكن الحدث اللي قلب حياتـي ولا أظـن ترجع زي ما كانت

.....

في يوم الاربعاء
جانـي خالـد للاستراحـه اللي نجتمع فيها مع الشبـاب والفرحه مبيـنه في عيونـه وسحبني من بينهم...

خـالد : تعال بنـدر ابيـك في كلمة راس...

لما صرنا برا...

خـالد_ وهو مبتسم _ : عندي لك مفاجـأة ...

أنـا ذاك الوقت اللي يشوف وجهي يقول خبـل اناظـر فيه وفاتـح فمي...

خـالد ..كمل كلامه..:: ابـشرك الوالده خطبت لـي!!!

في هاللحظه حسيت كأن احد عطانـي كف على وجهي...

أنا : ايييييييييييييييش؟؟؟؟!!!!...

خـالد _طالعني بنفس طريقته يومه صغير واللي ماتغيرت ابدا_:: وراك تـقولها كذا كنك مو مبسوط...

أنـا_بإرتباك_:: لا مبسوط بس انت فاجـأتني وصدمتني صراحـه!
مـا عمرك جبت طاري للزواج!!!!...

خـالد_ضحك وهو يغمز_: عـارف بس الوالده اقترحت علي الموضـوع وقلت لها مافي مانـع.. تـوقعت ان السالفه كلام او ع الاقل بتـاخذ وقت بس ماشاءالله عليـها يومين الا هي جايتني تقول :ترى لقينالك الظاهر انها حاطتها في بالها من زمااان,وبعدين ما عاد الا خير والا شرايك؟!!.

أنا : يعني للحين ما شفت البنت ياخلووود...

خالد : آفا عليك بس يابندر!!! الحين اقولك توي داري وجيتك بسرعه,الوالده تقول انهم حددوا يوم الاثنين عشان اجيهم اشوفها...

أنـا_تفاجأت_: الله بهالسرعه؟؟!!

خـالد : مو اقولك شكل السالفه مطبوخه من قبل

أنـا : على كلا" الله يوفقك ان شاءالله

خـالد: عقبـالك)) يـالرَمَت((

(خـالد لما كان صغير كان يحـاول يناديني بكلمه الـروميت الانجليزيه لكنه كان يقولها بهالطريقه ومشيت معنـا كذا صارت زي اللقب بيني وبينه),

انا _اغتصبت ابتسامه_: لا ويـن تو الناس علي باالزواج
المهم الحين خلنا نرجع للشبـاب لا يبدى التعليق...

خـالد_وبتعجب ممزوج بغضب مصطنع_: لحظه لحظه بندروه الحيـن اقولك خطبت وزحمه ولا تعزمني على شي بهالمناسبه؟؟!!
على الاقـل ودني لكوفي شوب يااخي!!

أنـا : هههههههههههههههه
لا ياعمي الحين قهوه وبعد شوي الا احنا في واحد من هالمطاعم حقتك اللي فواتيرها تكسر الظهر تراي اعرفـك زين خلاص عشرة عمر

خـالد : والله انك قعيطي مستخسر فيني؟؟

انا وخالد:ههههههههههههههههههههههههههه

انـا_حطيت يدي على كتفه_:ولااا يهمـك يـاخالد اذا صار شي اكيـد ,ابشر بذيك العشوه اللي يحبـها قلبك فالمطعم اللي تختاره وش تبي بعد؟؟!

"كان ودي اعزمه بس النفسيه عدم,,

خـالد_بغمزه_ : ماتقصر اصيل يـابندر بس اهم شي لا تفشلنا مثـل ذاك اليوووم!!

أنـا : افشلك ؟؟ متى ياويلك من الله؟؟!

خـالد_عطاني نظره اللي مو مصدق_ : معقوله نسيت ذاك اليوم
يوم يمدح لنا خوينا سامي ذاك المطعم قلنا لازم نجربه ونشوف !

لما تذكرت الموقف بديت اضحك...
أنـا : اوووه يقلع شرك وش ذكرك بهاالموقف الحين..!!

ابتسم خالد ويده على وجهه...

خـالد : تذكر؟؟
يومها طلبنا عصير وطقيت الصدر يعني انت اللي بتدفع ويوم جا الحساب جت معه المصيبه
والله لو انك شايف وجهك يابندر يوم شفت الفاتوره تقول صابين عليك مويه بـارده

أنـا_انحرجت_: لا والله !!!
على الاقـل احسن من اللي قعد يتفلسف ويسوي روحه ابو العريف
لااا وتـأشر بيدك بعد كننا في ملعب
وبديت اقلد صوته ونظرته المعروفه : لو سمحت الفاتوره مو لنا حنا طلبنا عصير بس!!
والله لوانك شايف وجهك انت يوم رد عليك الجرسون:
"نعم ياسيد هذي فاتوره العصير بس"
الحين من اللي طلع فشل الثاني؟!
اذكر مابقى في جيوبنا شي ما طلعناه ويالله كفى ولقطنا وجيهنا وطلعنا وحنا نتصدد لا احد يشوفنا..

,,وطـوال ماكنت اعيد القصه وخـالد ميت من الضحك
كان يسعدنا ان حنا نعيد الذكريات اللي مثل هذي ,,

..المهم رجعنا عند الشباب...

من بدا موضوع الخطبه حسيت انه خلاص ماراح يرجع شي زي اول
تضايقـت مـره بس مـا ادري وش اللي فكرت فيه
يـعني مستحيل نقعد كذا بدون زواج للأبـد كان واقع لازم ارضى فيه

لما رجعنـا داخل كان خـالد مستااانس,, يلعب ,,يضحك وينكت ,,
صحيح هذي عادته لكن اليوم كان بزياده

امـا انـا كنت عكسـه تمامـا" حسيت اني بأفقد هالأنسان... الشخص الوحيد اللي اعتبرته صديقي
• 2 •

يوم الاثنين العصر جاني للبيت!!

أنـا_خفت يكون صاير شيء_ :خيـر خـالد عسى ما شر؟؟

خـالد_وبتوتر واضح في صوته_: ابـد والله احس اني متوتـرشـوي...

أنـا_ابتسمت له_: يابن الحلال شـده وتـزول زي غيرها

خـالد_ابتسم _: وشرايـك تجي معي!!

أنـا_قعدت اطالعه ابي اتاكد انه جـاد_: انت صـاحي!!
ويـن اجي معك؟؟

خـالد : طيب تعـال وخلك فالسياره بس

أنـا_شديت على يده وحطيت عيني في عينه _:يابن الحلال رح لـحالك وانا بستناك في بيتنا طيـب..

خـالد_كان يطقطق اصابعه_:: ادع لـي يالرمت...

أنـا : ما يحتاج الله يوفقك ويسنع دربك ان شاءالله
يـاالله عـاد الحيـن رح وحلق وتكشخ تلقـاك شهر ما دخلت الحـلاق على هاالوجـه...

..كنت احاول اضحكه لأنه واضح انه متوتـر...

خـالد : طيب.. اجي عندك عشان تشوف شكلي قبل اروح لهـم...

أنـا_كتمت ضحكتي_: انـا لله وانا اليه راجعون
انت وبعدين معـك<_>؟
ياعمي اصلا البنـت اول ما تشوف عيونـك بتوافق لا تشيل هم وتوكل على ربـك

خـالد : الله يستر ما ادري وش فيني خايف ياعمي

(كلمة _ياعمي_ معروف اني دايم اقولهـا واذا قالهـا خلووود لـي يعني خلك معي او افزع لـي زي ماتقولون كانت كلمات بينـنا)...

أنـا : عـادي كل العالم يتوترون في هاالموقف بس انت شد حيـلك ولا تتأخر على الجماعه...

طلـع خـالد من عندي

وبعد العشاء كنت انا اللي مـا ادري وش اسوي بعمري من التـوتـر وكل شوي ادق على خالد لدرجة ان ريم اختي حـاولت تهديني...

ريـم : ما صارت يابندر يمكن انت متوتر اكثر منه

أنـا : يـا ريم هذا خـالد
تعرفين يعني وشو خـالد
هـذا اقـرب لي من نفسي

ريـم : والله عارفه بس اذكر الله

هدأ الوضع شوي

...ما بقى عندي صبر وطلـعت للشارع استناه

بعد حوالي ساعـه شفت سيارته جايـه عندي بسرعه جنونيـه كالعاده لدرجة انه بغى يدخلنـي تحتها لولا اني بعدت بسرعه
..نزل ويناقز من الفرحه..

أنـا_وبرعب صرخت فيه_:
خلووووود!!!انت خبـل بغيت اروح تحت سيارتك..

خالد ناظرني نظرات جديده علي وابتـسم

أنـا : ها بشـر؟؟

...))لمني الرجال وعرفت انها دخلت مزاجـه لدرجـة انه ما عاد يدري وينـه فيه
المشكله انه يتكلم ولا فهمت من اللي قـاله ولا حرف
...كنت اعرفـه عـاطفي بـس ما توقعت انه يتعلق لهالدرجـه وبهالسرعـه..

..فرحت له لمـا شفت كل هالسعـاده فيه
لكنـي بديت اتخيـل وشلون بيصير حالنـا بعد هالتغيـر اللي ما طرى على البـال

يمكن تستغربون ليش كنت متخـوف كثير بس صدقوني
لما يـكون عنـدك انسـان مـوجه لك كل ذره في كيـانه وكل فـكره معـك ولـفتره طويـله من عمـرك وفـجأه يجـي من يشـاركك فيه ,صدقوني تتلخبـط حياتك ولو كانت المشـاركه بسيطه وشلون لو جـا الانسـان اللي بيصير منافـس لك؟!
مـو حب تـملك
لكنها عـاده وغـلا كبير...
......
قطع حبـل افكاري خـالد وهو يـقول :: على فكره بندر في شي ابـي اقول لك ايـاه

...وجهه وهو يقول هالكلام ذكرني بوجهه لما جا يعلمني انه سـرق شاهي وحليب من غرفـة المدير واحنـا صغـار...

أنـا _بأبتسامه_: وش مسوي بعد هـالمره؟؟...

خـالد_مسكني بيدي وجلسنا على رصيف بيتنـا حسيت الموضوع جـد_ : صـراحه يـابندر انا ما قلت لهم اني ادخـن!!لحظه يابندر
قبـل لا تقـول شيء اصلا" هم مـا سألوا الا اليـوم وانحرجت وقلت لهم::لا مـا أدخن
خبـرك خفت يرفضوني

أنـا : افـاا ليش يا خـالد تبتدى حياتك بكذبه تـافهه؟!..

خـالد : ومن قـال لك انها كذبه؟! اصلا" انـا نويت اني اوقف زقاير...

))لما قال لي بكذا ضحكت!!تذكرت السنين اللي كنت احاول فيه انه يوقف وكيف انه حاول كم يوم ولا قدر وفالاخير لما اشوفه يعاني نستسلم, لكن من عيونه واضح انه كان مصر ومصمم هالمره على هالشي والله العالم((..

خـالد : بنـدر..اكيـد بيجون يـوم ويسألونـك انت بـالذات من بد الشباب عشان كـذا حبيت اعطيك خبر..

أنـا : مو شرط يا خـالد بالعكس كثير نـاس مـايفضلون يـسألون الاصدقاء المقربيـن وطبعا واضح السبب
لـكن لو جـاني احـد وسـألني عنك ماراح اكذب عـليه
بـقوله هـاالكلمتين يـالرمت خـالـد صديـقي من سنين والف النعم فيـه بس انـا متفق معه لمـا نـتزوج مـحد يعطي معلومـات عن الثاني عشان الإحـراج لأن زي مـا الواحد
يقول الحسنات لا زم يقول السيئات
مـافي كـامل فهالدنيا هذا زواج مو لـعبه وحنا ما نبي نضطر لـهالشي
بس اذا تبي العلم بـاختصار لـو طلبني اختي عطيته ايـاها وهذا كل اللي عندي..

خـالد_ربت على كتفي_ : ريحـت بـالي مـاخاب ظني فيك يـالرمت انـا اشهد اني عرفت من اخـاوي

،تـوادعنـا وركب سيارته,

دخلـت البيت وانا احس بضيـقه شـديـده صحيح دخلنا الـ26 ذاك الوقت يعني طبيـعي اللي قاعـد يصير
لكن مـا ادري وش اللي كان صاير معي

كـان يكلمني كل يوم عن المستجدات اللي صارت ويـسألني اذا كان احد جانـي من اهـل البنت
وأنـا اقول له للحين ما شفت احـد وحتى لما نتقابل طول الوقت يتكلم فهالموضوع

..بـيني وبينكم بديت اطفـش صـار كل كـلامه عن زواجـه لكن اللي معجبني في هـالسالفه كلها اصراره على تـرك التدخين

صحيح حالتـه كاسره خاطري يعني الصـداع مـاتركه ابـد وعيـونه دايـم حمـر
ونـفسه في خشـمه
طـول الـوقت والربـع كلهم يحطمونـه
يقولون:: أول ما تتزوج بترجـع لا تتعب نـفسك..
بـس في تقدم
قعد اسبـوع وشوي شوي
بـدون ولا زقـاره

كان مصر على هالبنت ومايبي شي يوقف في طريقه وخالد صديقي واعرفه زيـن
..اذا حط شي في بالـه يجيبـه..

...

• 3 •

يـوم الخميـس


زي عـادتنا كنـا مجتـمعيـن أنـا والربـع فالاستـراحه

وخـالد للحين ما جا صار دايم يتـأخر لكن عمره ما تركنـا

..كنـا جالسين بعضنا يلعب ورقه والباقين يسولفـون..

أنـا كنت العب وسمعنا صفقة الباب اللي برى
وبـما ان خـالد اللي نـاقصنـا عرفنـا انـه هو

..وبدى التعليق ..
اللي يـقول: جانـا العريس
والثاني يقول: الله يعينـا عليه من اول مـا وقف زقايـر وهو نـار شابـه

قـلت لهم : كلش الا خـويي عاد لحد يغلط عليه وانـا موجود ...
وقعدنا نضحك

فتح بـاب الغرفه والتفـت اسلم عليه

مـاحسيت الا واحـد يرفعني من القلابي ويلزقنـي عـالجدار بـقوه

لمـا حاولت اعرف من هو!!
الا هو خالد كان معصب ويـصـرخ في وجـهي ويـدفع جسمـي عـالجـدار بـطريقه عنـيفه

كنـت مصـدوم واطـالـع فيه مـو فـاهم شـاللي صايـر

حتى ربعنـا يطالعـون بتعجب ولما استوعبوا ان السـالفه هوشه قاموا يفكونـه عنـي

في هاللحظه
أنـا للحين مـا بعد استوعبت الموقف بس يـوم شفتهم يسحبونـه عني حسيت انهم اوجـعوه
بديت ابـعدهم معه
واحاول احميه بيـدينـي
كنت خـايف عليه
وجسمه صار احـمر من تسحيـبهم الشديد

وانا لهاللحظه مـا ادري وش صاير لكنهم كانوا اكثر منا وقدروا يمسكـون كل واحد في جهه

سـامي_سأل خـالد بعصبيه_: انت صاحي؟!! وش جـاك انهبلت وش صاير؟!

خـالد_بصوت انسـان ثاني ما عرفته ويـاليته ما تكلم_::
اسأل هالجبان اللي قدامكم وش سوى لا تسألوني انا..

في هالوقت بديت استوعب الموقف...

خالد قدامي في حاله عمري ما شفته فيها,معصب والكلام يطلع مقطع منه بسبب تنفسه السريع
نظرتـه مـاغيرها تطل من عيونـه بس الـحقد حـل محل الـبراءه

كان كل شوي يحاول يتخلص من يدينهم عشان يضربني!!

تصوروا!!بعد كل هالعمر وهـالعشره يضربني ..!
انـا بندر صديـق عمره ورفيق دربـه

أنـا _احاول اقرب عنده اهديه_::وش بـلاك ياخـالد انا وش سويت يـاخوي؟!

خـالد_رجع يحاول يتهجم علي وابعدونـي عنه بسرعه_::
لا تقول يـاخوي انـا لاني اخوك ولا اتـشرف اكـون اخـوك
وبصوت تخالطه البحه من شدة الصراخ وهو يمسك راسه بين يدينه بعصبيه

:وبعدين لا تقول وش سويت يـاحقير لا تـنرفزني زيـاده


أنـا خفت عليه كان يصارخ ما يتكلم ويطلع كلام زي السم...

خـالد_بعصبيه_ :
لمـا ما تكون قد الكـلام اللي تقوله لا تقعد تتفلـسف علي يـا اكبر كذاب..


سـامي : خالد وش هالكلام؟!! كبر عقلك وخلنا نفهم القصه

خالد_صرخ فيه_: انتم لا تتدخلون
_ورجع يطالعني وهو يضرب على صدره بقهر واضـح_
انت مـا شفتني اموت فاليوم عشريـن مره وانا احاول بكل مـا فيني اني اوقف زقاير ليش تقولهم اني كنت ادخن ليـش؟!...


أنـا_كنت هاللحظه زي الغبي وعيوني بتطلع من مكانها _:: خالد انا قلت لك محد جـاني ولا احد سألني

..كلامي زاد ثورته وقام يتحرك زي المجنون

خـالد :
هذا اللي يبي يذبحني، بنـدر لا تـكذب لا تكذب ما ابي اسمع منك ولا كلمه صحيح انهم رفضونـي بس ما يهم البنت بدالهـا الف

_وبدت نبرة صوته تخف حدتها_:
لكـن انت ليـش سويت كذا يا بندر ليش؟! الكلام اللي قلت لي ذاك اليوم كـان كله كذب وتمثيل؟!!على الأقل ليش توعدني وتخلف لو قلت انك بتعلمهم كان تـفهمت الموضوع, انت حطيتني في اصعب موقف، معقوله استخسرت السـعاده اللي انا كنت عايشها ولا قدرت تستحمل فكره اني ابعد عنك شوي!! معقوله يـابندر انت من بد هالـعالم كلهم تسوي فيني كذا هذا جـزاي اني عزيتك؟؟!..

_رجعت النبره العاليه_:

مـا توقعتك كذا ابدا انت انسـان اناني تعرف يعني ايش اناني؟!


أنـا_حاولت اتمالك نفسي ورديت بصوت هادي قد ما اقدر_: بـس لا تكمل لا تقول كلام تنـدم عليه بعدين يا خالد لا تظلمني وانـا اخوك

خـالد_ضحك بسخريه_: ‎
اندم!!اندم على ايش والا ايش؟!
على العشره الحلوه اللي كـانت بيننـا
والا على16 سنه اللي ضيـعتها من حياتي على واحد مثـلك
والا ع‎ ‎الانسان اللي توقعته صديقي وما طلع،،،،،،،


،،،وقبـل مـا يكمل كلمتـه هالمره انا اللي تخلصت من يـدينهم

و هـجمت عليه ورميته عـالأرض, ولـما ثبته تحتي رفعـت يدي لكنها وقفت وكل عضلـه فيـني ترجف رجفه فظيعـه

لأن اللي تحتي كان خـالد
خـالد الرفيـق !!
خـالد الغالي !!

يـارب انا وش قاعد اسوي معقول امـد يدي عليه؟!

أنـا_صرخت في وجهه_:
أسمع يـا خـالد كل الكلام اللي قلته ممكن اتغـاضى عنه عشان غلاوتـك اللي بقلبـي
ولاني متـأكد انه فيه سوء فهـم فالموضوع
امـا انها توصل فيك انك تقول اللي بيننـا مـا كان شي
فهذا اللي ما راح اسمح لك تقوله فااااهم؟!...


خـالد_خلص يدينه من يديني ودفعني من فوقه_: اقـول ابعد عني بس

وقف وانا للحين على الارض...

خـالد:
اسمع يـا بندر هي كلمه و رد غـطاها
ما عاد ابي اشوفـك
ولا عاد ابي اسمع صوتك
او حتى طاريـك
وكل اللي كان بيننا اليوم انتهـى الانسان المخـادع
اللي مـا يقدر الصداقه ماله مكان في حياتي ابـد
واذا كنت سويت هالحركه خـايف انك تفقد جزء مني يـا طفل ابيك تدري اللحين انك فقدتني للابـد


طلع من الاستراحه بنفس الحال اللي دخل فيه واشرت لسامي وانا احس بأرهاق شديد :اطلع معه الله يعافيك لا يسوق السياره وهو على هالحال بعد هو مب ناقص جنون فالسواقه

راح سامي ،،لكنه رجع بعد دقايق يقول انه ما قدر يلحقه،،

انتـشر الهدوء بعد طلعة خـالد وكانوا كلهم يطالعوني مو عارفين وش يقولون

كانـوا مصدومين مثلي واكثر,وقفت ويدي على قلبي حسيت اني مخنـوق وانـا احاول استجمع القوه اللي بـاقيه فيني

قلت : عذرا" يـاشباب متأسف على الفصل البـايخ اللي صار قبل شوي, يالله انـا مـاشي...

سألني سامي بتردد واضح:لحظه قبل ما تمشي يابندر صحيح الكلام اللي قاله خالد؟!

هزيت راسي بأسى وانا امسك دموعي اللي عصتها شيمه الرجال وبابتسامه رديت:ليـش استغرب منكم انكم تصدقـون هالكلام فيني اذا كان خـالد خوي الروح قدر يصدقه؟!!!!

مع السلامه.. وطلعت,

لـحقني سامي :خلني اوصلك للبيت يا بندر تـراك على طريقي

شكله حاس بتأنيب ضمير وراحمني وهذا اللي ما احبه رديت::لا مـشكور انا بخير لا تشغل بالك..

.وركبت السياره ومشيت.

فـالبيت الوالده وريم كانوا فالصاله لما دخلت

استغربوا رجوعي بدري..بعد السلام
سألت الوالده باهتمام:بندر يمه وش فيك؟!
ريم _بعد ماقالت شي زاد الالم اللي في قلبي_:عسى ما شر يابندر خالد فيه شي؟؟؟…

انـا_حاولت امثل اني معصب _:
انتِي ماتفهمين؟!! كم مره اقولك يارويم لا تتفاولين على العالم، يا جماعه كل اللي صار ان احنا تفرقنا بدري الليله عادي وشفيكم؟!..

الوالده: ياولدي وجهك متغير انا امك واحس فيـك قلي يا امي من اللي مضيق صدرك؟!..

ريـم: لا يكون متطاق مع واحد من العيـال؟؟

قالت امي: وش دعوه ما تعودنا منك ياوليـدي هالحركات؟!!

كنت عارف ان شكل ثيابي يدل على اني توي طالع من هوشه…

قلت لهم : ريحـوا بالكم تهاوشت مع واحـد من الشباب بس جت سليـمه خلاص عـاد فكونـي

ريـم : اكيـد بتـجي سليمه اذا كان خلوود الـمرعب ابو المشـاكل هو اللي دايم يفزع معك المفروض محد يقرب لمك

هزت راسها كنها تذكرت شيء مو حلو...
يمه منه ذاك الولد شراني ياكثر ما صيحني وحسرني وحنا صغـار،تذكرين يمه ذيك الايام؟!

ابتسمت امي: اول سنتين من نقلتنا للريـاض ماكنت اربط شعرك دايـم تجيني تصيـحين من تمعيطه لـشعرك..

ريـم : وتضحكين بعد يمه المشكله ان ولدك ذا كان يطقني معه مـا كني اخته الحمد الله والشكر...

قالت امي : صحيح ان خـالد كان شيطان وهو صغيـر بس والله ان الولد والنعم فيـه شوفي وش صار الحين...

... آلمني كلامها زياده بس سويت الوضع عادي ووجهت كلامي لريم ::
وانتِي وش تبين مـا عندك الا خالد وخالد؟!
بعدين تستاهلين رازه وجهك عند العيال فالشارع دايم وهو معتـبرك اخته...

حسيت اني احرجتها

ريـم : انـا والا انت اللي ما عنده الا خـالد؟!!..

قطعت الحوار و رحت للغرفتي
• 4 •

قـعدت في فراشي استرجع اللي صـار معقولـه
خـالد يسوي معي كذا ويقول عني هـالكلام
وبدون حتى مـا يفكر وقدام هالعالم كلهـم؟!!

لا اكيد انا احـلم اصلا اللي شفته اليوم انسـان ما اعرفه!!!

((ورغـم الإهانه اللي كنت احس فيها والـجرح اللي في قلبي الا اني دست على مشاعري ورحت ادق عليه لازم افـهم وش اللي مضايقه لهالدرجه ليش؟؟ لانه مو اي واحد
لكنه للاسف عطاني مشغول بعدين قفل جواله ))


جلـست في بيتنا ثلاث ايام
لا رحـت للاستراحه كالعاده
ولا استقبلت مكالمات من احد حتى اهلي مستغربين

لكن لأن طبعي كتوم ما قدروا يعرفون أي شي

كـانت هذي اول ثلاث ايـام ما اشوف خالد فيها
واحنـا في نفس المكان مرت علي كنـها ثلاث سنوات

،،ورغم اللي سواه معي الا انه وحشنـي حيـل واشتـقت لـه ذاك الشوق اللي تحسه يـوجعك مو بس نفسي الا تحس شيء يألمك من جد اذا فـاهميني!!!

لكنه الله يسامحه مـا حاول يعطيني أي فرصه عشان اتصل عليـه،،
.....

اتـصلوا الشباب من الاستراحه وكـانوا حاطينه ع السبـيكر وسلموا علي وسألوا عن احوالي

عـاد واحد منهم اسمه
مـاجد قال : وينـك!؟
من زمـان عنك يـارجال
كبـر راسك علينا والا عشان
خويـلد ما عاد يجي صرت انت بعد ما تجي؟!

..سمعت كأن احد ضربه وسكته ..

المهم ..
قـلـت : معليـش يـاشباب انا هاليومين ما اعتقـد اني بجي للاستراحه مالـي نفس سامحونـي..

سامـي: وشرايك نجيك للبيت اذا ما عندك مـانع؟!...

أنا _استغربت _: بالعكس حياكم الله أي وقت البيت بيتكم

سامي : خلاص اذا شفنـا يوم مناسب بندق عليك

أنـا : على خير ان شاءالله
الله يحييكم أي وقت...مع السلامه..


بعـد شوي دق خالد !!!

معقوله مـاني مصدق عيوني وش القصه؟!

قعدت سـاعه اطـالع الأسم ابي اتأكد انه فعلا هو

..، لكن للاسف سويت شي بظل ندمان عليه طول عمري

عطيته مشغول وقفلت الجوال,

ليش سويت كذا ما ادري
اظـن انها كانت ردة فعل طبيعيـه بعد اللي صـار لي معه وما اعتقد احد يلومنـي

يمكن ابي ارد له اللي سواه
او كنت عارف لو رديت انه بيكون لي فضل عليه وهذا اللي ما ابيه المهم هذا اللي صار,

لـكن الوضع استمر صار يدق علي وانا مـا ارد
كنت اعاند قلبي قبل لا اعانده

هو صار يرسل مسجات يتـرجـاني فيها اني ارد لكن اللي فهمته من بعض المسجات انه يبيني اسـامحه

لانـه اكتشف انه غلط بحقي ومن هـالكلام اللي خلى عنادي يزيد...

بـعد يومين
دق علي طـلال اخـو خالد الكبير
"هو بعد صديق عزيز يجلس معنا من فتره لفتره فالاستراحه وكنت اغليه من غلى اخوه واحترمه كثير"

ولا قدرت اصفطه رغم اني عـارف سبب المكالمه

رديت: مرحبا طلال...

طـلال : هلا وغلا وش اخبارك وعلومك يابندر؟

أنـا: ابد والله تمام...انت أخبارك واخبار الأهل؟

طـلال : تسلم كلهم تمام, بندر ياخوي!!

أنـا: ســــم؟

طلال : سـم الله عدوك, انا داق عليـك عشان موضوع خـالد انا عـارف انك مـاتبي احـد يـتدخل فالموضوع حتى خالد مو راضي يتكلم انا عرفت من الشباب وفكرت كثير قبل اكلمك لكني ماقدرت اشوف حالة اخوي كذا واصفـط يديني, الصراحه من ذاك اليوم وهو مو خالد اللي نعرفه لا يروح ولا يجي
ماعاد يسولف
ولا يضحك
حتى الاكل دايم ما يشتهي!!
والـوالده ضايق صدرها عليه تحسب انـه زعـلان على البنت وتقول لاخواني وين بندر عنه محد بيوسع صدره الا هو!!، صار طول الوقت في غرفته خاصه لما عرف انه مالك يد فاللي صار، وليتها جت على كذا خالد رجع يدخن بعد بس هالمره بشكل يخوف يـابندر...

أنـا_قلبي انقبض_: والله يـاطلال انـا
مقدر موقفك وخوفك على اخـوك
واعرف ان قلوبكم على بعض دايم وصدقني اخر شيء اتمناه ان خالتي مايضيـق صدرهـا
وانت عـارف زين اني اعتبرهـا امي الثانيه لكن انا ما غـلطت معه ابد
هـو اللي جاني ونسف كل شي حـلو كان بيننا في لحظه غضب...

طـلال : طيب مـاتبي تعرف وش القصه !!
وليش خالد سوى معك كذا؟..

أنـا : مهمـا كانت القصه مـا تعطيه الحق انه يسوي اللي سواه
تـراحنا ماعدنا صغار وانا اخوك,بالله هذي طريقه يعاملني فيهـا؟!!
والله اني ما شفته يسوي كذا مع الناس اللي كان يتهاوش معهم وهو مراهق، خـالد قدر يقول عني كلام يجرح بدون ما يراعي أي شي ويصدق فيني كذبه بدون حتى ما يعطيني فرصه ادافع عن نفسي

طـلال _تنهد_: يـاخوك اللي صار ان اهل البنت قبل لا نحدد الملكه رفضوا فـجأة يقولون انهم عرفوا انه يدخن او على الاقل كان يدخن ولا عندهم استعداد انهم يجازفون
ومن ضمن الكلام فهمنـا ان اللي قالهم بندر
وانجن خالد لما سمع اسمك كان مصدوم وقعد يصارخ يقول كيف يسوي فيني كذا وهو وعدني؟!
وطلع وصار اللي صار
لـكن اللي فـهمناه بعدين انه طلع بندر ولد جيرانـا>>آخ ياالقهههررر>>
بس تبي الـصراحه مـحد من اخواني جـا على باله
كلنا رحنا لك على طول لما سمعنا الاسم

أنـا_ضحكت بتعجب _و اقول في قلبي "هذا الشيء التافه هو اللي خلاك تظلم خويك ياخالد؟!"_:
والله ياطلال هذا مو ذنبي ولا هو عذر للـي سواه معي
خـالد ظلمنـي وكسر في داخلي شي عمره مـا يتصلح والله انه غالـي
وانا مسامحـه
ولا ابي شيء منه بس صدقني مـا اقدر -وحسيت اني ماعاد اقدر اكمل...

طـلال_بنبره هادئه _ :على كلا" انا حبيت افهمك اللي صار وانتم رجال وفـاهمين وش تسوون وانا ما اقـدر الومك على شيء بس هذا اخـوي يا بندر ولازم احاول اسوي اي شي

أنـا : اعذرني ياطلال ياليتك جيتـني في شي ثاني والله رقبتي سداده

طـلال : أصيـل مـا تقصر يابندر اشوفك على خير
...مع السلامة...

لما عرفت التفاصيل ضاق خـلقي زيـاده كنت اتمنى ان الموضوع يكون اكبر يعني معقوله يسوي كل ذاك الفصل عشان تشابـه اسماء؟!
شي يـحز فـالخاطر صراحه صحيح ان خـالد معروف عنه انه عصبي ولا يقدر يضبط نفسه بس هالكلام المفروض ماينطبق علي،على الأقل مو بهالطريقه اللي صارت!!

بـأختصار حسيت اني مثلي مثل غيري بالنسبه لخالد...

_في اليوم الثاني_

جت الوالده تصحيني الساعه10الصبح :يمه بندر اصحى خالد عند الباب

...كنت متوقع ان هالشي بيصير وحاسب حسابه ..

أنـا : قولـي له نايم...قلتها وانا اغطي راسي بالبطانيه..حاولت تسحبها من فوقي

امي : يوه اقولك خالد عند الباب وش بلاك ياولدي...

أنـا _على صوتي شوي_: عـارف انه خـالد سمعتك من المره الاولى وانـا اقوولك نااااايم...

...تعجبت الوالده من تصرفي لاني اول مره اسويها لكني ما عطيتها فرصه عشان تستفسر,..

طلعت من غرفتي وانا نطيت من فراشي للشباك على طووول
كنت اشوف سيارته لكن ماقدرت اشوفه حاولت منا ومنا مـافي مجـال

صـار يمر على بيتنا يوميا
الظهر
والليل
وانا اتهرب منه واصرفه
ولا عمري طلعت له

ودروا اهلي ان بيني وبينه شي اصلا واضح مايبي لها ذكاء

اما جوالي صار مايسكت سواء مكالمات من خـالد او من الناس اللي يحاولون يصلحون بيننا و مسجات طـول الوقت حتى اذا قفلته وفتحت الثاني
او الاثنين سوا كان يدق عليهم على طول

ما ادري العب على مين
هذا خـالد اللي يعرفني زين ويعرف كل ارقامي وحتى لو كان عندي رقم محد يعرفه فهالكلام ماينطبق عليه
...
• 5 •

ذااك اليـوم اشتقت له
ورجعت بي الذكريات لايـام الابتدائي
و يـاكثر المواقف اللي حصلت لنا لأن اللي يصادق واحد مثل خـالد تتحول حياته لمغامره


مره في الصف السادس اذا ما خـاب ظني كان الاستاذ مسوي مسابقه اللي يفوز بيصير"العريف"اللي ينظم الفصل اذا ما كان الأستاذ موجود..!!



والله ايام وحشتني



المهم

انا كنت ميت عشان اصير هالعريف اجي بدري، واشارك، وصاير مؤدب
"ثقيل دم على قولة خـالد"
كان مـايحب الاشخاص اللي مثلي
يهتمون بالدراسه ويحبون المدرسين او يتمصلحون عندهم على قولته
بس سبحان اللي جمعنـا مع بعض
كان يقول:ليش تبي تصير عريف؟!! ترى العيال بيكرهونك..
مـا اهتميت لكلامه ورديت..ابي اصير كيفي!!
بعدين يا غبي بخليك تطلع وتدخل على كيفك..
خـالد: لا مو لازم انا اسوي اللي ابي حتى لو ماكنت انت العريف

...المهم
قبل لا يختار الأستاذ بيومين شريت بلونات وجبتها للمدرسه
خـالد كان مريض و غايب بس انـا والشله رحنا ومليناها مويه واول ما انتهى الدوام رميناها من فوق وانحشنـا،

بتقولون وين الولد المؤدب لكن انـا بعد خالد صارت تجيني طلعـااات
توقعت الموضوع محد بيدرى عنه
لكن من بكره
اول ما جيت الصبح قالوا لي الشله :
ان الأستاذ يسأل عن اللي جاب البالونات وسوى الحركه اللي امس

هنا انا قلت على العررريف السلاااام
هالاستاذ مايصدق،

رحت لخالد اللي متجمعين عليه كل الشله بما انه كان غايب امس،
علمته باللي صاير وهو يدري انا وش سويت امس لاني قلت له السـالفه واحنا جايين للمدرسه،

قال: خلاص ولا يهمك انا اتفاهـم مع الأستاذ
كنت اعتمد عليه كثير، لما بدت الحصه دخل الأستاذ وبنبره كانت تخلينا ننتفض..
الاستاذ : اللي رمى البالونات امس يوقف..
محد رد فالبدايه كان ماسك مسطره وش كبرها الله يسامحه...

الاستاذ: شوفوا لو ما تكلمتوا بعاقب الفصل كله...

ناظرت خالد وانا بموت من الروعه ابتسم وغمزلي بعدين وقف ...

خـالد: انا يا استاذ...قالها كنه محرر القدس!!

قرب الأستاذ من عنده _وسحب اذنه_: والله اني عارف انه ما في غيرك ياخالد يسوي هالحركات،
انت متى بتعقل ليش ما تصير مثل اخوانك او مثل صديقك بندر جننتني معك ياولد!!...

الصراحه ما توقعت ان خـالد بيتحمل اللي صار بدالي؟؟!

فعلا كنت مستغرب والدليل اني قـاعد اتفرج وهو يتعاقب وانا سـاااكت!!

طبعا الأستاذ كسر المسطره على يدينه وانا احس ان عقلي بيطير من المنظر بعدين وداه للمدير...

في نفس الحصه اختارني الاستاذ عريف وطبعا ما تهنيت بالخبر لاني ما ادري وش صاير مع خـالد ذاك الوقت..

لما انتهت الحصه كان واقف قدام غرفة المشرف وحوله بعض الاولاد،

يوم شافني ركض ولمني...خالد: أحلااااااا اخيرا وصلت اللي تبي مع وجهك...

انا ما كنت اقدر اتكلم اشوف يدينه حمر من الطق ويفركها على جسمه ووجه الاسمر تخالطه حمره بسبب المرض وهو يضحك...

قلت _وانا متنرفز يمكن من الأحراج_:خـالد ليش سويت كذا انا ما قلت لك_ _ _

_ _ _قاطعني...

خالـد : يا بن الناس يعني اول مره انطق خلاص مشها
يالله لازم نحتفل اليوم...

من بعد اللي صار عمرنـا ما تكلمنا عن هالسالفه شكله نساها او ما اعتبرها شيء بس عمري ما نسيت صحيح اننا كنا صغار لكن فزعته هاذي لا يمكن انساها...

هالذكريات شوقتني له و رحت اتفرج على صورنا وعلى اشرطة الفيديو ,
عجبني كيف كنـا مره قريبين من بعض ولا في مكان يطلع فيه واحد الا الثاني جنبه,

اغـلب الاشرطه ما قد شفتها من قبل كانو حوالي العشرين شريط شي لسفراتنا وشي لطلعات البر وكلها شفتها في يوم واحد ورى بعض

اكتشفت اني طول الوقت اطالع فيه هو حتى فالصور عيني عليه بس, وطوال وقت عرض الاشرطه وانا اضحك عليه كان بطبعه خفيف دم محد فهالدنيا يخليني ابتسم او اضحك اوحتى يجنني مثل مـا يسوي

واحد من الاشرطه كان فيه مقطع اثر فيني كثير
كنـا مخيمين فالصمان

وواحد من الشباب يصور ومعه خالد
مروا على اغلب الشباب, اللي ينصبون الخيام واللي ينزلون الاغراض

و خـالد كان ماخذ دور المقدم عشان يتهرب من الشغل كالعاده هو واللي معه وقعد يسوي مقابلات معاهم ويستهبل عليهم وانا اضحك طـول الوقت على طريقه كلامه وتعليقاته لما جا دوري كنت قـاعد اشب الفحم ومعطيه ظهري
قرب مني...

خالد : عااد جينا الحييين لأغلى انسان...
كنت مشغول باللي معي...

أنـا:هلا هلا خلوود,مسوي فيها مذيع يعني؟!!ما ودك تساعدني بدال هالخرابيط ازعجت العالم ياعمي...

كان يوجه كلامه للكاميرا وحاط يده على ظهري وانا مو معطيه وجه ...

قال : هالولد اللي تشوفونه عرفته من يوووم احنا صغار عزيز وغااالي علي ولا ابدله بكنوز الارض...

قاله اللي يصور: ما اقدر انا على هالكلام!! يا بعدي هاللي انت كاشخ فيه وتمدحه من الصبح حتى ما عطاك وجه وانت تتكلم...

خـالد: طالعني بنظرات ما انتبهت لها ذاك الوقت كانت تحمل معاني حلوه... كمل كلامه..
ولله لو ايش يصير ما يتغير شي من غلاه..

(( تجمعت الدموع وانا اسمع كلامه مع اني ذاك الوقت واضح اني ما انتبهت
لـ أي كلمه جتني مشاعر متضاربه كنت اقول في نفسي
"كلام رائع لكن ماطبقته ياخالد باللي سويته فيني"
سكرت الفيديو ورحت انام او بالاصح احاول انام.

يوم الثلاثاء

رجعت للبيت متأخر ولما وصلت عند الباب
شفت سيارته, كان يستنى داخلها
والله وحده اللي يدري من متى,

وعلى ما يبدو لي من طريقة قعدتة وتكتيفة يدينه انه نااايم لأن راسه مايل على جنب بس شكله متغير مره!!

اول شي لحيته بدت تطلع,
شعره تركه يطول بدون ما يرتبه وهذي مو عادته ابد,
واضح ان جسمه ضعف يعني كأنه واحد توه طالع من السجن...

وقفت سيارتي لكنه ما حس ما ادري وش اللي خلاني اصفق باب سيارتي بقوه عشان ينتبه ..

يمكن ما كنت ابغى انتظاره يطول،
فز من نومته و نزل بسرعه ،ناداني وصوته تخالطه بحه واضحه
و خالد من النوع اللي صوته يروح بسرعه اذا صارخ او اذا صار مريض حسيت بتعبه,لكني ما التفت له وسويت روحي ما اسمع ودخلت للبيت,

الرجال قعد يطق الباب زي المجنون لدرجه اني خفت يصحي الجيران ويفضحنا قدام العالم وانا واقف عنده من داخل منزل راسي واسمعه ...

خالد: افتح يابندر خلني اكلمك الله يعافيك لا تسوي فيني كذا يابندر...

كان كل مره ينادي فيها باسمي بصوته اللي
مره تسمع الكلمه
ومره ماتسمعها

اتألم بس من جد ما ادري وش قوة القلب اللي جت لي فجأة وخلتني اتماسك ولا اطلع له كل ما مر الوقت زاد عنادي,

بعد فتره سمعت صوت جسمه ينسحب على بابنا كنه يقعد فالارض ,

رحت اركض بافتح الباب خفت انه صار له شيء

,لكن سمعت صوته يكلم نفسه لانه توقع اني دخلت داخل خلاص...

خالـد: سامحني يا بندر انا اسف والله اسف ...

وانا اسمعه كنت كأني اسمع اعتذار من طفل متأكد ان اللي قدامه ماراح يسامحه

جلست على الارض وحطيت راسي بين يديني وسندت ظهري للباب من داخل , وانا افكر في نفسي"معقوله اللي قاعد يصير معنا يارب؟!!"والله دنياغريبه، وجلسنا ساكتين،،

بعد فتره سمعته يتحرك ويركب سيارته


بعد يومين

جاني واحد من ربع الثانويه اسمه _نواف _كانت علاقته قويه مع _خالد _والى الحين وهم ربع
بس هو مو من شلة الأستراحه

ابتسمت اول ماشفته تذكرت على طول هباله هو وخالد ايام كانوا يرقصون سامري فالصف كانوا اجرأ اثنين وكيف جتهم تهزيئه من المدير خلتهم ينسون الرقص كله
وسبحان الله وشلون تغير هالنواف وصار شيء ثاني رغم ان خالد لازال على جنونه...

ماقال شيء عن الموضوع لكن جيته صدقوني كان لها اثر في نفسي ذكرتني بأشياء كثيره واظن ان هذا مقصده من الزياره
• 6 •

جاني مسج من خالد فاليوم الي بعده

وكان مقطع من اغنيه تعجبنا ودايم نرددها يقول المسج:

ما جيت ابسأل جروح او سبة غيابــي..

المشكله"اعرفـــــــك" اكثر من أسرارك..

وأكثر من جـــــــروح قلبي ورقه اعتابــي..

))قلي بعد هالـــــفراق وش آخر اخبــارك((؟؟!!..

المسج اثر فيني لأن خـالد مو راعي مسجات ولا يعترف فيها

وقررت ارسل له مسج كرد من نفس هالاغنيه بعد بتعديل بسيط مني:

مــاهي غريبه اذوق وانطفي بنــارك

ولا هــي بعيده اشوف الجرح باحبابــي..

حــاولت أنسى ولكن ضاعت اعــذارك

مادام جرحــك ))يالرمت((
مكتوب بكتابــي!!..
.....

يوم الخميس

اتصل سامي:هلا بندر...

فرحت بمكالمته ذكرتني بالجمعات فالأستراحه...

أنــا :هلااااااااااا سامي وش الاخبار...

سامــي : تسلم, وش دعوه يـارجال وين الناس اشتقنالك...

أنــا: تشتاقلك العافيه ياخوي...

سامي : فــاضي اليوم نمرك انا والشباب بين عشوين؟...

أنـا: الساعه المباركه
حياكم الله والله ودي بشوفتكم...

ســامي : اجل نشوفك اليوم ان شاءالله...

أنــا: لا تطولون صلو في مسجدنا
.. مع السلامه..
....

جوا الشباب على موعدهم على انهم ما صلوا عندنا
ورحت افتح لهم

ماشاء الله كان الكل جاي ما ادري وش الغلا اللي جا لي فجأة,
ولما اكتملت المجموعه وانا ارحب فيهم قبل لا اسكر الباب

دفعه واحد فتحته بسرعه وقبل ما اشوف مين

قلت: السموحه ماشفتك يـــا...

...كان خــالــد!!!

مــا عرفت وش المفروض تكون ردة فعلي

لما تلاقت عيوننا بعد كل هالغيبه
حسيت كني بطير من الفرحه في داخلي
وانا احاول بكل ما اقدر اني اخفيها واني ما انط عليه واحضنه

خالــد_ابتسم ذيك الابتسامه الحلوه _: والله وحشتني حييل

وهو زي ماتقولون كنه واحد غرقان ورد النفس...

فتــح يدينه عشان يلمني لكني بكل جمــود مديت يدي وصافحته بدون أي كلمه!!

قبــل لا يصيــر في خــاطركم شيء علــي
تــذكروا اللي سواه فيني وش ممكن تكون ردة فعل اي احد فيكــم،
فالأخير احنــا بشر ولنا مشاعرنــا وانفعالاتنا اللي مو دايم لها تفسير ولا نقدر نتحكم فيها مهما كانت مكانة الشخص بالنسبه لنا..

الشبــاب سبقونا للمجلس

اصلا كان واضح القصد من هالزياره اكيد خالد هو اللي جابــهم كلهم

توجهت للمجلس لكنه سحبني من ذراعي ناحيته بقوه, وبصوت هامس يحمل كل معاني الندم والرجا...معقوله مــا وحشتك؟!!..
مارديت عليه وكمل كلامه...لــمتى يــابندر بتظل تتجاهلني, كلمني رد علي
هزئني اوحتى اضربني انا راضــي واستــاهل لكن لا تسوي فيني كذا حــرام عليك والله اني تعبــان
وفهمت غلطتــي
وعــارف اني ما اقدر اعوضك
لكن هالعقاب والله فــوق طاقتي
يــكفيني يـابندر انت بالذات تدري اني مــالي غنى عنك...

كــان قلبي يقول لي...ياخي خذه بحضنك وانسوا كل هالالم لكن الله يلعن ابليس
العنــاد والكبريــاء
سيطروا علي والموقف اللي صــار فالاستــراحه بيــن عيوني


قلت _بكل برود وانا ابعد يدينه عني بهدوء_:جعل يدي تنقص قبل يجي اليــوم اللي تنمد فيها عليك ماضربتــك وحنا صغار تبيني امدها الحين؟!!

"كانت نغزه على حركة الأستراحه"
و يالله الشباب ينتظرون داخل...

نــزل راســه بانكسار ودخلنــا

واضح ان الشــباب كانوا يحاولون يلقطون شي من الحوار اللي دار بيننــا

لكن اول ما دخلت كل واحــد التفت على الثاني وســوى روحه متعمق في سالفتــه

بديــت اصب القهوه
ومسك خــالــد الدلــه الثانيه,
كـانت هذي عادتنــا لما يزورني احــد دايم نفزع لبعض بس هالــمره ماكنت ابي أي مساعــده منه

واللــي زاد قهري

ان خـالـد باللي صار خلانــا فرجــه لخلق الله
ومــحل شفقه الجميع وهذا اللي مــاكنت استحمله..

قلت لماجد اول واحد بصب له
_بصوت واطي وانا اضغط على اسناني_:رح قله يترك الدله ومشكور ما نبي منه شي...

كملت صب وسمعت مــاجد يقول لخالد اللي بدى يصب من الجهه الثانيه : هات الدله عنك...

خـالـد: لا استرح تسلم انا ابي اصب مع رفيقي...
"وشدد على اخر كلمه يبيني اسمع"
...لكن بمزحه بايخه وقاسيه في نفس الوقت يرد ماجد:هذا اول يالحبيب زين انه سمح لك تدخل لبيته معانا هات عنك بس
...وقعد يضحك..

"حسيت انه جرح خالــد وتعمد يهينه ولولا اني حكمت عــقلي ذيك اللحظه وتذكرت انــه في بيتــي
كــان صفقت وجهه بالدله اللي معي

صحيح ان مــاجد كان معروف عنه انه انســان فظ وعربجي ومزحه زي وجهه ولا يثمن كلمته او حتى يفكر فيها قبل يقولها
لكن لو في ظروف غيــر هذي الله العالم وش كنت بسوي فيه...
هذا اذا ما أدبته اول مايطلع

وخــالد ادري انكم تقولون
طيب هذا اللي انت تسويه مع خالد
بس ما ادري اذا قد جاكم هالشعور انه ممكن اجرح او ازعل انسان غالي علي بس لو احد ثاني حاول يفور دمي و اعصب!!!.


المهم
سويت روحي مــا سمعت وكملنا صب,جلسنــا,
اللي يسولف واللي يضحك كنه ماصار شيء

الا انــا وخــالد كنت امر بعيوني عنده كل شوي, ولأني افهمه من عيونه وبدون أي كلمه عرفت انه ينتظر الشباب يمشون


اذن العشاء وقاموا الجماعه الا خــالد وكنت متوقع هالشي بــعد
ودعتهم وشكرتهم على الزياره

عند الباب قال لي سامي بــيني وبينه:والله انكم مفضوحيــن الغلا واضح بينكم حتى لــو حاولتوا تبينون العكس
والله الله في خــالد وانت عــارف اكثر مني انه مافي مثله انت العــاقل ولا تغلط غلطته
انتم بدون بعض
اسمح لي
مــا تسوون شي
ولا تخلون شي تافه يهدم احلى صداقه شفتها في حياتي
اصــلا والله يـابنــدر
انه يــحز في نفسي اني اوصيك عليــه وانتم اللي من اول نخاف نقول شيء عن واحد منكم قدام الثاني...

شكرته وقلت : قلبــي يــاسامي ما يزعل وانت تعرف خــاصه على خالد بس الأمور احيانــا تطلع من يد الواحد والله يخليــك لا تفتح معي الموضوع مره ثــانيه تــراه علي اصعب مما تتخيلون

ودعته وراح

ولما التفت لقيت خــالــد واقف عند الباب الداخلي ينتظرني
قربت عنده بدون أي كلمه وكتفت يديني

بدى بالكلام على طول...

خـالــد: بنــدر سامحني يااخوك ترى كل هـاللي قــاعد يصير ماله داعي
انــا تهورت وقلت كلام ماكان لازم اقولــه
وجيت اليوم اعتذر لك واحب راسك بعد
"تكفى"خــل عنك العناد وريح بالي ترى ما صارت المسامح كريم يالغالي

...سكت فتره اول مره اسمع تكفى منه..
كانت طالعه قويه منه

لكني حاولت اختار كلماتي قبل لا اقوله شيء..

أنــا: آسف يـا خالد صدقني ما اقدر انت حطمت كل الاشياء الحلوه لك في داخلي بعد ما سمعتني ذاك الكلام والا نسيت؟!!
اذا انت نسيت تراي اذكر كل كلمه قلتها وتتردد في بالي كل يــوم
ذاك الكلام اللي زي السم واتــهمتني بــاطل بعد بدون ما تحسب لصداقتنــا أي حســاب
يــا خــالد انــا للحين احس اني في حلم مو قــادر اصدق اللي صــار
انت من بــد كل هالعالم تبيعني في لحظه؟!!
مــا كان الــعشم والله...

خالــد_وبصوت مليان ألم_:يعنــي ايش يــابندر 16 سنه صداقه معقــول مــا قدرت تلقى لي لحظه وحــده تشفع لي عندك وتخليك تسامحني؟؟؟!!

..بعد كلامه انهمرت الذكريات من كل جهه لكني حاولت اتجاهلها بكل ما اقدر وانفجرت...

انــا: اسأل نفسك قبل لما اهنتني قدام النــاس بــدون مــا تعطينــي حتى فرصه اني ادافع عن نفسي
انت يــا خــالــد حتى ما حاولت انك تظن فيني خير وبعتني بسهوله
نسيت كل شي يا خلووود
نسيت اللي اذا ضــاقت بك الدنيا يصير لك الدار
ويضيــق خلقه لين تنفرج عليك
ونسيــت اللي صــانك وحفظ اسرارك طول عمره
نسيــت اللي ما يرضى احد يغلط عليــك
وانــت بكل بساطه تظلمــه وتحرجه قدام الكــل
يــاليتك قدرت معزتــي ومحبتي الكبيره لك
_حركت يديني بعصبيه_:يــا خســاره يــا خالد انا بس ابي اعرف ذنبي
قلي ليش سويت معي كذا؟؟!
عمــري غلطت عليك بكلمه؟
او حتى ضيقت خاطرك بحركـه؟
تــجرحني بــهالسهوله ليــه؟
علمنــي يـاخـالد لا توقف ساكت تكلم يــا اخوك؟!!

..المشكله هنــا ان الغلطه جت من غالي وهذا اللي يخليني ما اقدر امشيها...
عضيت على شفتي وانا اشوف مــلامحه تتغير
...تجاهلته وكملت...
:تدري وفــر علي كل الكلام اللي بتقوله
لأنــه مــا عــاد ينفع شي الحين اللي انكسر مــا يتصلح
مــا عــاد لك بــقلبي مكان ليتني مــا عرفتــك يــاخــالــد...

..كنت اقول هالكلام عشان ارد لــه اللي صــار فالاستراحه وداخلي يصــرخ...

خــالــد: يــا مكبر كذبتك يا بندر انت لو احد سألك وش دنيتك مايجي في بالك الا أهلك وخــالد...
سكتــنــا شوي
وخــالد يهز راسه وعيونه تتلامع

وأنــا الف صوت في داخلي يقول لــه : تــراي مثلك يالغالي عزيز وداخلي منهــار
وعشــان انهي هالمشهد الحزيــن
قبــل لا اضعف قدامه

قلــت: في بيت شعر سمعته مره
ومـا اظن ان معنــاه وصل لي او يمكن المشاعر اللي وصفها الا اليــوم:

الجرح لا جــا من اغـــراب عـــــــادي..
بس الجرح مـوت الجرح لا جا من احبــاب..

"لا جا من احباب" يــاخالد وانت ياخــوي
ما قصرت كفيت ووفيت معي فهمتني البيت بطريقه ما اظن الا متأكد ان ما احد يقدر يوصلها مثلك
ما ودي اقول اني نادم على الماضي لاني فعلا ما ندمت لكنك خيـبت ظني فيك...

خــالــد : _رفع راسه وقرب يده من اذنه من قسوة الكلام اللي سمعه_: كــافي يـا بندر كافـي
انا عارف انك دايس على قلبك وانت تقول هالكلام
فــإذا كنت تــبي تثــبت لي شي او حتى لنفسك صدقــني تراك اثبته
واذا كــنت تحس انك مخدوع فيني
او مصدوم
فــأنت الحين بأصرارك على الــزعل تسوي مثلي
ومهمــا صـار
او بيصير ترى غــلاك في قلبــي هو الاول
دايــم وعشرتــك عمرهـا مـا تـهـون عنــدي
وبــالنسبه لك
انــا اكثر انــسان فــاهمك في هالدنيــا
عشــان كذا بصبر عليــك شوي و مـا راح استسلم
وعـارف انك مهما تقسى وتبعد
طيــبــتــك
وحـنـيـة قــلبـك
بـتـرجـعـك لـخويــك
وعــارف بعد اني ما اهون عليــك...

أنـا_همست وعيوني فالأرض_: وش اللي يخليك متأكد لهالدرجه؟!
مثل ما هنت عليك في يوم بتهون علي اليوم !!...

خـالــد_ طالعني بنظره يائسه وحزينه_: الله يـسامحك يـابندر والله ما اظن انه يفرحك انك تجرح خويك بهالطريقه...
اذا كنت قــادر تنسى وتلغي احلى سنوات من طفولتــك وشبابك فانت بتقدر تنسانـي
امـا بالنسبه لـي فانا ما اقدر استغني ولو عن لحظه من ذكريات عمري معك لاني ما اقدر انسى حياتي كلها ...

رديت _بسخريه_: واللي سويته فالأستراحه وش تعتبره؟؟
مثل مانسيت اللي بيننا بسوء ظن انا نسيته بهالــجرح
و ادري انك ماتستحمل فكرة ان اي احد يزعل منك لكن انا--

...قاطعني...

خــالــد: يابندر انت مو اي احد وراك تكلمني كذا؟!
فتح عيونك تراي خلووود...

أنــا: فعلا انا مو اي احد والدليل سواتك
فيني...<<ياالله رد نفس المواال يااخي المسامح كريم<_> عصصبت خخخ<<

خــالــد_ابتسم بألم_: لا حول ولاقوه الا بالله
مـا توقعت العناد يوصل فيك لهالدرجه
على كل حـال الموضوع الحين صار في يدك وتقدر تحكم فيه بالطريقه اللي تبي بس اتمنى انك ما تسوي شيء تندم عليه، ولا تغالـط نفسك اكثر من كذا انت تعرف من انت بالنسبه لي وهالعالم اللي حولي بدونــك
مــا ابيهم
ومــا اقدر اتــخيل
ان اللي كان بينا بيكون ذكرى في يوم من الأيــام انت متخيل هالشيء وانت تقول هالكلام؟!!...

هزيت راسي...محد يموت قبل يومه الدنــيــا كذا والحمدالله على نعمة النسيــان...

...اقامة الصلاه.. ~ 7 ~

بعد هـالموقف
حسيت براااحـه كبيـره
حسيت ان احنا متعادلين الحين

او يـمكن كـان سبب الراحه اني تكلمت معه بعد فتره اعتبرها في نظري طويييييـله
وطلعت كل اللي في خـاطري

اصلا ما عاد فيني صبر على فـراقه واكيد انه حس بغلطته


وهذا اللي كنت ابيه وقررت اني انسى اللي صار خلاص و ارد عليه اذا دق المره الجايـه

واسامحه واطلب منه يسامحني بعد
يعني حتى انـا قلت كلام ما كان لا زم يطلع مني
وقررت ان احنـا نسافر بعد عشـان نعوض كل الايام اللي بعدنـاها عن بعض

علمت ريم بالسالفه كلها كانت مستغربه وهي تسمعني

ريـم : تصدق يـابندر هذي والله العالم عيـن وصابتـكم
اجل معقوله خـالد يسوي اللي سواه
لا والأغرب انك قويت نفسك ولا سامحتـه
..لا لا اسمح لي هالكلام ما يـدخل العقل..!! ..

أنـا: ههههههههههههههههههههه
من جدك مـا سامحته؟؟!!

اصلا من اول ما شفت اسمه في جوالي سـامحته على طوووول
و بيني وبينك
قـلبـي مـا قوى يزعل عليـه
من الاصل لكن الظاهـر اني كنت امثل على نفسي
قبل لا امثل على احد!!
و المسأله بأختصار كانت رد اعتبـار

لكن تعرفين حنا مو زيكم
انتم يـالبـنـات
اذا زعلت وحده الثانيه تعتذر على طـول.. غالبا ..
والثانيه بعد تسامح بسرعه وهذا في ظني اللي يخلي صداقـات البنات اجمل واطول بعد

امـا الشباب فالكرامه والعزه تـتغلب على الـعواطف الثانيه
دايـم نـحس ان احنـا مو بحاجة احد
والاعتذار بعد من اصعب الاشيـاء علينا
هذي طبيعتنـا اللي حطها ربي فينـا
هذا وانـا وخالد نعتبر طفره جيـنيـه
بالنسبـه لصداقـات الرجال
الله يعين ان شاءالله انا الحين بس
استنـاه يدق خلاص ماعاد فيني صبررر

ريم_طالعتني مستغربه_: والله انك غريب يـابندر طيب ليش ما تدق انت عليـه؟!!

أنـا: اوووه انتي غبيه؟؟
والا تستهبلين ؟؟
وش قـاعد اتفلسف عليك من الصبـح؟؟
اقوول لك ما اقدر صعبه علي
وبعدين خلوووود مـا يقدر يصبر بـعد اكيد بيـدق هو قال لي انه بينتظر علي شوي...

ريـم_عطتني نظرات ما ادري وش تبي _: الحمدالله والشكر لحد يسمعك بس
وبعديـن لا تسوي روحك فاهم البنـات
لأنك مـا عندك سالفه
وفي شيء ابيـك تفكر فيه تتوقع لـو الوضع كان العكس خالد كان بيسامح والا بيسوي مثلك؟!!

..وطلعت...

قعدت افـكر في كلامها واللي اجابتـه كانت واضحه بصراحه

وهي بعد كانت تعرف الاجابه لان مواقف قديمه تبين ان خـالـد حتى لو كان صعبه عليه يسامـح
ومن النوع اللي زعله شيـن بس انه يسامحني دايم مهما صار..

لكن هالكلام مايهم الحين..

مـر.. كـم يوووم

وخـالـد للحين مـا دق


بـيـوم الأربعاء

شفت 100 مس كول من طـلال
ورجعت ادق عليه
_وقلت في نفسي _
"اكيـد ان خـالـد يبيـه يتوسط بيننـا
لأنه يعرف معزة طلال عندي لما فقد الامل فيني
وبـعدين انـاخلاص
وصلت عندي ابي كل هالسالفه تنتهي

دقيت وانا فرحـاان...

أنـا: مرحبا طلال...

طلال : هـ...هـ لا.. بندر..
صوته ابـدا مـا عجبني واختفت الأبتسامه...

أنـا: طلال خير ان شاءالله عسى ماشر؟؟
معليش ماكنت عند الجوال قبل شوي
بغيتني في شي؟!...

الرجال بدى يتنهد وحسيت ان في شي مو زين صاير ...

طـلال : بنـدر انـا لي ساعه احاول ادق عليـك لكن ....

أنـا : طـلال ياخوك لا تلعب باعصابي قلي وش فيكم؟!

...انـا ذاااك الوقت الهواجس لعبت فيني لعب
قلت ابوهم توفى لأنه كان رجال كبير فالسـن ومريـض من زمـان
والا اخـوهم الصغير تركي اللي كان عنده ربو حاد جاه شي

كل شي مر في بالي وكنت طـول الوقت افكر بس في خـالـد
وشلـون بيـتقبل هالاشياء
وانـا اعرف غـلا ابوه واخوانه عليه
وعزمت اني انسى كل اللي صار
و اوقف معه في محنتـه

كل هذا قبل لا ينطق طلال بحرف ...

طـلال: خـالـد .. يا بندر........!!

لما سمعت الاسم حسيت ان قـلـبـي وصل حـلقـي ولا عاد قدرت اتكلم او حتى اتـنفس
وبصعوبه...خـ...خـ...الد وشفيه حراااااام عليك تكلم؟؟!!

كنت انتفض وركبي ما عاد تشيلني...

طلال : خـالـد يـطلبـك الحل يابندر ادع له بالرحمـ.....

ماقدر يكمل وخنقته العبره...

امـا انـا فكنت سـاكت
ولاعـاد اشوف شي قدامي


قعد يتكلم كلام ما فهمت منه شي اللي قدرت استوعبه انه الظاهر صار له حادث والظاهر انه كان متوجه لبيتي وتوفى فالمستشفى...

قفلت الجوال
كنت واقف
قعدت على الارض
وبعدين انسدحت عالأرض وقعدت اناظر السقف لفتره طويـله

ويدي على راسي فقدت الاحساس بكل اللي حولي
لا دموع
ولا كلام
ولا صدر مني أي ردة فعل..

طلعـت بسيارتي امشي فالشوارع

مـا وعيت الا انا فالمجمعه ديـرة خـالد اللي تبعد عن الريـاض حوالي الساعتين
ويـاما زرنـاها سوى

وقفت السياره قدام فلتهم اللي يجونها ايام الشتاء

لما جا الليل رجعت للرياض..

دخلت البيت ورحت لغرفتي وقعدت اتقلب في فراشي

تصوروا كل هذا بدون أي احساس الظاهر اني ما كنت مستوعب المصيبه اللي انا فيهـا

لما جا الصبح رحت لبيتهم على طول وقبل اوصل
دق علي طلال:... الو...هلا بندر, اذا ودك تسلم عليه وتودعه قبل الدفن تعال للمغسله اليوم قبل صلاة العصر

ما رجعت للبيت رحت للمغسله وسألتهم قالوا ما بعد وصل من المستشفى
تبون الصراحه كان للحين عندي امل ان السالفه كذب او فيها غلط زي حال الكل وقت المصايب ماودهم يصدقون, واني بشوف خالد بعد شوي،
قعدت عند الباب الى الساعه
3:00

والا اشوف سيارة اسعاف جايه ووراها سيارات اخوان خالد كلهم
وقف الأسعاف وفتحوا الباب الخلفي
شفت طـلال وباقي اخوانه عند السياره

لما شفتهم يطلعون طرف شي ابيض

شهقت
ورحت اركض فالشارع

كنت احاول ابتعد عن المكان بقد ما اقدر
مشيت لين وصلت اخر الشارع وجلست على رصيف واحد من البيـوت

لمـا هدت نفسي شوي رجعت للمغسلـه
..كـان لازم اواجه الواقع لو كان قـاااسي..

الجزء الثامن

دخلت المغسله
وانـا شماغي على كتفي
ومـاسك عقالي في يدي وحـااالي دمـار
لقيت مو بس اخوانه حتى اعمامه واخواله وزوج اخته بعد

الـكـل كـان متـواجـد

لمـا شافونـي تغيرت وجيـههم وحضنوني بحراره
كلهم اعرفهم ويعرفوني زين

عرفت اني ذكرتهم فيه لما شـافوني

حتى واحد من اخوانه ما رضى يتركني كنه بتعلقه فيني
يـحس انـه مع اخـوه خالد والغريبه انهم كانـوا يعزوني بدال ما انا اعزيـهم

المهم
جـانـي طـلال_ وعلامـات التأثـر باينه في وجهه_:
تبي ادخل معك؟؟؟
احنا تونا طالعين

... قاطعته...
قلت : لا لا بدخل لـحالي...

كانت هذي اول جمله نطقتـهـا من اول ما دخلت للمغسله

حتى لما عزوني ما رديت عليهم..

تـعوذت من ابلـيس وبديت اذكر الله
و دخلـت
في الغرفه اللي دلوني عليها

كانت فيها روايح غريبه
الريحه اللي قدرت اعرفها هي ريحه المسك والصابون

الظـاهر ان الـرجال اللي كان فالغرفه هو المغسل

وقفت في مكاني عند الباب ماكنت عارف وش اسوي؟!!

قرب جنبي و كان شخص يميل للقصر ,ابيض, لحيته طويله وصاحب ملامح سمحه,

حط يده على كتفي وحس بالرعشه اللي تهزني كنت اطالعه بنظرات استغاثه...

وبصوت وقور قال:عظم الله اجرك ياولدي واحسن الله عزاك
الله يلهمكم الصبر والسلوان

روح له وقبّل جبهته وادع له بالثبات عند السؤال
وباللي يجي في بالك...

كنت اطالـعه وانـا اشهق بدون دموع وطلع من الغرفه..

شوي شوي قربت من عنده وشفت منظر في حياتي ما مر علي مثله
حسيت الدم وقف في عروقي لما شفته انهارت كل حصون المقاومه والصبر اللي بنيتـهـا

مـا ادري وشلون اشرح الوضع كانوا حاطينه على شي زي الطاوله ومرتفعه عن الارض بمسافه قليله

مغطين جسمه بشراشف بيضاء الا وجهه وجزء من صدره
كانت عينه وجزء من جبهته متحوله للون الازرق من فعل الصدمه
اما خده ورقبته كانت فيها جروح بسيطه
لكن واضح ان تركيز وقوه الصدمه كلها جت على صدره

كان زي اللي نـايم بس بدون أي اثـر للحياه والظاهر اني مـا صدقت الخبر لين شفته بعيونـي

فقدت اعصابي في ذيك اللحظات
وصرخت
صــــــرخــــــــه
بـأعـلـى شي عندي

حـضـنـتـه بين يديني وقعدت اصيح بحرقه زي الاطفال

دخلوا علي بعض اخوانه
يـوم سمعوا صوتي وحاولوا يـاخذونـه مني لكني كنت متمسك فيه بقوه..

طلال : يابندر قل لا اله الا الله لا تسوي في نفسك كذا ترى ما يجوز...

وانا اصرخ من كل قلبي احس اني فقدت عقلي للحظات...
اتركوني
خالد يا اخوك رد علي ,
كلمني ياخالد ,
طلال خالد ليش بـارد؟؟ليش تاركينه كذا؟؟ ليش مـاغطيتوه؟؟
حـرام عليكم...

طلال _نزل راسه وانسابت الدموع من عيونه_: انا الله وانا اليه راجعون...
تعال معي يا بندر تعوذ من الشيطان وخلنا نطلع...

وانا احاول اكلمه..
ياخوك وين رحت وتركتني؟؟
انـا من لي غيرك يـاخـالـد؟؟..

ودموعي سيول واخوانه يحاولون يفكون يدي عنه..

وبعد جهد قدروا ياخذونه من بين يديني بعد ما بين اثر ضغطي على جسمه

وانـا منهار وفي حال مايعلم فيهـا الا الله سبحانـه

كل لحظه انادي بأسمه..

جابوا لي كرسي وقعدوني عليه وانا كني معهم ومو معهم...

واحـد من اخـواله شيخ كبيـر من الناس اللي فيه خير وصلاح والله هاديهم قعد يمسح على راسي وصدري ويقرى علي قرآن لين هدت نفسيتي شوي

أنـا_ناظرت فيه_:خالد صدق راح يا خال؟!...

شد على يدي وهز راسه ورجعت دموعي ويدييني على راسي
وانا اهز على الكرسي..

مايصير يا خال والله ما يصير...

قـعد يستغفر وانا على حالي، كنت مفجوع الله لا يفجعكم في حبيـب...

رحنا نصلي عليه كان المسجد مليان واللي برى اكثر من اللي داخل

كان الله يرحمه رغم صغر سنه انسـان محبـوب من الجميع صغـار وكبـار

وفي المقبره مع الزحمـه وكل هالعالم اللي حولي الا اني حسيت بوحده رهيبـه

كنت بعيد عن الجماعـه
مـا ابي احد يعرفني او حتى يشوفنـي

رغم اني عارف ان الكل يسأل عني
تـلثمـت بشماغي ولبست نظارتـي الشمسيه ووقفت بعيـد عنهم

جاني تركي _واللي كان له غلا كبير عند خالد بحكم انه الصغير وكان دايم يقول انه رغم صغر سنه الا انه كان حكيم ويفهم اكبر من عمره بكثير
كـان عمره تقريبا ذاك الوقت12سنه سلم علي وحضنـته وانا احاول اتماسك قدامه

ولكم ان تتصورون مقدار صعوبه الأمر خاصه انه يشبه خالد كثير

قال لـي: بندر.. خـالـد كان يعزك اكثر من أي واحد في هالمكان وكلهم مجتمعين حوله الا انت!!
لا تتخلى عنه في هاللحظات عشان مـا تـندم بـاقي حيـاتـك
تـشجع وادع ربي انه يصبرك بس لا تـحاول انك تهرب من احـزانك بهربك من هالموقف...

كانت كلمـات عظيمـه اثرت فيني
وشفت في هالطفل اللي فقد اخوه في حـادث مفجع
الصبـر بمعنـاه الحقيقي

لميتـه لـصدري مره ثـانيه
وكنا نواسي بعض بخسارتنا الكبيره

مسكت يده وتوجهنا لهم...

استعدوا للدفن وسمعت اخوانه ينادوني...

قلت لهم اني انا اللي بنزل فالقبر واحطه ونزل معي واحد من اخوانه يساعدني...

سلمونـا ايـاه من فوق وحطيته وانا ادعي لـه واذكر الله طول الوقت

كان ودي لو اجلس معه اوحتى اشوفه واسمع صوته لاخر مره لكن عرفت ان شمسي غابت خـالد ))الرمت((

..غـاب من حياتي
وهالحياه للابـد..

...
9 _


بعد و فاتـه

رجعت ذاااك الطـفـل الكتـوم المنطوي على نفسه...

انـا تركت قـلبـي معه لما تهاوشنـا

ولما راح..

راح قلبي معه
ابتعدت عن النـاس والعالم فتره طويله
كنت فـاقده بشكل خيالي واللي يـحز في خـاطري اكثـر لما اتذكر انه توفى واحنا بعيدين عن بعض يعني16سنه عمرنا ماتفارقنا وقبل اقل من شهر على وفاته نتهاوش!!!

اللهم لا اعتراض راضي بقسمتك وحكمك يارب

لكن املي فيه انه كان فاهمني وعـارف اني ما اقدر استحمل زعله وقلبي ما يشيل عليه واني زي مـا قال مهما حاولت آكابر وانسـاه مصيري ارجع له..

بعد عدة اسابيع على وفاته عـطاني طـلال دفتـر
وقـال : هذا كـان من اغراض
خـالـد -الله يرحمه-
واظن ان من حقـك تتطلع عليه وتحتفظ فيه بعد اذا ودك

لما شفت الدفتر تذكرتـه على طول

كنا يوم انا واياه في المكتبه بنشتري كتب للجامعه
وشاف الدفتر وعجبه

وقلت له: هذا مايصلح للمحاضرات ياعمي

قال : عارف بس تدري وش باستخدمه فيه؟!
بكتب فيه مذكرات لكن مو أي شي
الاحداث المهمه في حياتي بس

اذكر اني ضحكت عليه من قلب
وقلت له :انت من جدك؟!!
والله ما تصلح لك هالحركات

ونسيت الموضوع بعد كذا

فتحت الدفتر وكان مكتوب بالصفحه الاولى:

بالرغم من اني اعتقدت ان اليوم الذي ستملئ به هذه الصفحات لن يأتي ابدا, الا انه اتضح لي عكس ذلك.
وعدت يوماً اني لن اكتب به غير احداث مهمة من حياتي ...احداث تستحق الكتابه وقد جاء هذا اليوم بالفعل...
فاليوم أخطأت في حق صديق عمري ورفيق طفولتي.
....
بعد هذي الكلمات القليله بعددها والكبيره بمعناها في قلبي لقيت بعض ابيات الشعر:

"بـنـدر حـرك ضـمـيـرك واعـتـرف اني وفيـت...

سيـرة النكـران هذي فضهـا واذكـر غـلاي...

اعتـرف بسـك تكابـر منت واصل مـا بغيـت...

ريـح عنـادك وخلنـا انتفاهـم باللي جـاي...

لا تـحـاول تـمتحنـي مـا خذيت؟!الا خذيــت...

قـلـبـي الغـالـي بـلاش وما تركـت الا شقـاي...

صح في لعبـة غيابـك زاد شوقي وابتليــت...

بس لاتظلـم تراني مـا صبـرت الابرضــاي..

مـا دريـت ان المحبه قاسيـه لكن دريــت...

خطـوة المليـون جرح وافقت دربي وخطــاي...

كم تذكـرت الليالي وانت يا خلي نسيت...

ومن تنـاسى صدق ذاتـه ويش اقول الله معــاي...

يـابني آدم تلاحق خاطـري لامن طريت..

خلك الطيب وحـاول تكسب الوقت بوفــاي..

لا تخليهـا معانـد أن قويت او مـا قويت..

الـقوي الله))يـاعمي((وانت تدري عن مـداي..
.....

وبعد كذا انهى كتاباته بهالبيت:

خسرت ولا ربحت الا قليل من الصبر وجــراح

ربحت بنـدر وان خسرت العمر عسى تحييني اوراقـي

.....

وهذا كان اللي مكتوب بكل هالدفتر بس

الدفتر عنده قبل اكثر من اربع سنين وهذا اللي مكتوب فيه, ولاشي اعتبره مهم في حياته الا هوشتنـا

ما ادري اذا خالد -الله يرحمه-كان حاس بموته من قبل والا البيت جا كذا
المهم لميت الدفتر لصدري وقعدت ادعي له

كنت اقعد مع طلال بعض الايام
ومره قال لي ان في آخر سفره لخالد مع اهله واللي ماراح معهم طلال فيها قال له: مـاوصيك على بندر ياخوي لا تخليه يحس اني مو موجود خلك حوله دوم..

كمل كلامه وانا ماسك دموعي اللي اتعبتني...

طلال: ادري انه مافي شيء يخليك ماتحس انه مو موجود مثل ماقال وما في شيء يعوضك او حتى يعوضنا بس ترانا كلنا حولك
حتى ابوي يسأل عنك دايم...

رديت _وانا اغالب الدموع وافكر في حال اهله من بعده_:مـاتقصرون...

حاولت اشكي له شوي يمكن اخفف من هالألم الفظيع اللي احس به..
والله انه ماعاد لي قلب ياخالد-->>قصده بيقول ياطلال>>.. يوم حسيت اني غلطت بالأسم خلاص انهرت وفضحتني دموعي..

رجعت للبيت وبعد فتره
دخلت ريم علي تحاول تواسيني وتطلعني من دوامه الحزن اللي انا فيها...

ريـم : بندر يا اخوي كل شوي والله اني خايفه عليك..

كانت جايبه عشاء لكني صديت عن الأكل...

أنـا: طلبتك ياريم والله ما اشتهي شي..
..هزت راسها..
ياخوي فضفض وطلع اللي في قلبك انا اختك وحاسه فيك ما يصير تكتم كل هالالم في قلبك

أنـا...رفعت راسي...: وشلون تبيني اتكلم يا ريوم
الوحيد اللي قدرت اشكي له في يوم راح وخلاني
خـالـد راح يـاريوم وتـركـنـي في هالدنيا لحالي...

ريـم :استغفر ربك يابندر هالكلام ما يطلع من واحد مثلك انت انسان مؤمن وتعرف ربك

وبعدين حرام عليك تضغط على نفسك وتحملها هموم فـوق طاقتـها
تتوقع خـالـد _الله يرحمه_يرضى لك بكذا

..امتلت عيوني بالدموع زي كل مره اسمع فيها اسمه وانا احاول اخفيها عنها..

ريم _مسكت يدي_:لا تحاول تخفي دموعك يـاخوي طلع اللي في قلبك اللي فقدته مو شوي
انا يـاخوي جايـه اقول لك ترانا كلنا معاك وحولك في أي وقت تحتاجنا فيه...

أنا: ياريم انا شفت الدنيا على يده لكنه ماعلمني اعيشها بدونه
انا خسرت القلب الكبير
من بعده صرت اشوف كل شيء حزين
الدنيـا ياريم ماعاد لها طعم بدونـه
ليت الزمن يرجع و ......

ضغطت ريم على يدي: لا تعذب روحك ياخوي كلمة -ياليت- ماتنفع وهذا قدر الله..

،،،،
ورغـم مرور السنوات على وفاتـه

الا اني عمري ما نسيته اوحتى راح من بالي عايش داخلي دايم وادعي له بالرحمه والمغفره كل الأوقات

رحت للعمره ادور الراحه النفسيه بالقرب من الله تذكرت وانا اطوف لما اعتمرت انا والشباب العام الماضي

قسمنا نفسنا عشان الزحمه كان خالد ماسك يدي و يمشي فيني بين الناس وانا اقرى من كتاب الادعيه وهو يأمن

ولما رحت اشرب من زمزم تذكرت شكله وهو يصب المويه على راسه وجسمه كنه في بيته

واحنا نقول له: ترى وراك سعي ما راح تعرف تمشي واحرامك مليان مويه
و يرد: "واذا صار؟!!والله ماعندكم سالفه هذي بركه يالله سوو مثلي بلا دلع"

وفي السعي لما شفت العربات تذكرته لما كنت اجره بالموت عشان ما يوقف
وهو يأشر على العربات"الله يخليك خلنا نقعد شوي خلاص يابندر رجلي ما تشيلني خلنا نرتاح شوي والا شرايك نستأجر عربه وانت تدفني؟!" ...

وانا اهاوشه على كلامه واجره بالقوه...

أنـا: خالد تراك اذيتني قسم بالله البزران مايسوون مثلك...ولما جينا نتحلل كلنا قصرنا شعورنا الا هو حلق شعره كله،

كنت دايم في اي عمره اقصر شعري لكن هالمره حلقت..

واخيرا
لما رجعت حافي للفندق زي ما كان يسوي خالد تذكرت لما خلينـاه ينـام على الأرض فالغرفه

وشكله وهو يهمز رجله بعد تعب العمره وهو يتأفف: ياسلام عليكم بتنوموني على الأرض هالسنه بعد؟؟

ترى ما بيني وبينكم الا شهور،
حرام عليكم مو كل مره بندر وسامي ياخذون السرير في هالغرفه المفروض يصير فيه تنـاوب!!
فالغرفه الثانيه يتناوبون مو انتم يالظالمين...

بس محد عطاه وجه ولما قام الصبح كان يشتكي من ظهره وانا اضحك على طريقة مشيته...

أنا :امش زين لا تنصب
والعمره الجايه ان شاء الله بتنام عالأرض بعد رد علي..

خـالـد:هين يابنيدر ان ما خليتك انت تنام على الأرض انا مب خـالـد

... سبحان الله دنيا دواره..

هالسنه اعتمرت لحالـي ونمت عالأرض وتركت السرير فاضي

ولما قمت الصبح وحسيت ان ظهري يوجعني ابتسمت بحزن

استقبلت القبله وقعدت ادعي بحراره ودموعي تنهمر

...يـارب اغفر له تراي احبه فيك
ياربي ارحمه و برد علي وامسح على قلبي واجمعني فيه..

...كانت هالعمره الله يتقبلها لخـالـد...
الأخيــ_10_ـــر

اقترح علي شيخ فاضل من اهلنـا
اني احفر له بير في وحده من الدول الأفريقيـه الفقيره واسميه بأسمه ـ الله يرحمه ـ
عشان ارتاح بعد

وعلمني عن الأجر الكبيـر اللي بيجيه ان شاءالله
وفعلا سويت هالشي

كنت تعبان من جد اشوفه في كل الوجيه واسمع صوتـه في كل الاصوات

وذكرى آخـر يـوم شفتـه فيهـا ما تفـارقنـي ابـد...

في عيون الناس اشوف اشياء كثيره
بعضهم يذكروني دايم ان خسارتي مو بسيطه وبعضهم وحشتهم شوفتنا مع بعض وهذا يتعبني زياده..

واللي يصعب الوضع علي بعد اني وين ما التفت
القى ذكرياته ماليـه حياتي
اثاث غرفتي اللي اخترناه سوى
لما انتقلنـا لبيتنـا
سيارتي اللي اختار لونها وساقهـا قبـلي
وعطره اللي للحين في درجها!!

يـاغـلاة اللـي راح...

لكن كل ما اتـذكر ان ذاك الانـسـان كان
صديقي
ورفيقي القريب في يوم من الايام

افرح
وابتسم
واعرف ان الله يحبني اللي رزقني بـأخ مثله

والله يعوض عليه شبابه في الجنه ان شاءالله

. . . .

اذا كنتم تقدرون تناظرون في عيـون ربعكم اليوم
وتسمعون حسهم في هالدنيـا احمدوا ربكم على هالنعمه وحطوهم على راسكم دوم خاصة الناس اللي يستاهلون صدق

واعرفوا انكم محظوظين لان غيركم ما يملك ولا بعض اللي عندكم

اما بالنسبه لي مابعد خـالـد احد
والله يجمعني فيه بالجنه
ان شاءالله...

انا عرضت قصتي على الناس عشان تاخذ منها عبره

ووفـاتـه
شي مقدر ومكتوب لكني ابتعدت عنه في آخر شهر له في حياتـه
بسبب تـافه جـدا
متخيلين قمة القهر والألم؟!!

هو _غلط رحمة الله عليه_ وانا عاندت لكن اللي صار بيننـا ما كان يستاهل اللي سوينـا

وهذا اللي دايم يسوونه الناس يخسرون احبابهم وربعهم باسباب تافهه

يتركون الشيطان يلعب في عقولهم لين تكبر السالفه ويفترقون

ولو سألهم احد عن السبب يلقون ان ما عندهم اجابه واضحه وهم ما يدرون ان الاشخاص اللي يحبونهم يمكن يروحون فجأة

يـانـاس انـا استنيت لين صار صديقي ذكرى تبون تستنون مثلي؟؟!!...

لذلك..
اطلب من كل واحد يقرى قصتي يدعي
لـ...خالد بالرحمه
ويدعي لي ان الله يمسح الحزن اللي عايـش فيني كل هالسنين ونصيحه من قلب ذاق مراره الفراق

"الانسـان اللي تحبه وتغليـه
رح اليـوم وقله هالكلام خله يدري
لا تستنـى
يمكن مـا تـلتـقيـه بعدين الا مثل مـالاقيت خالد

وشي ثاني مهم لا تنتظر انك تفقد انسان غالـي عشان تعرف قيمته وقدره عندك"


....ختـامـا"...
الى الفقيـد الغالـي ..
الانسـان اللي علمني كيف احب الناس والحياه
الانسـان اللي نسى سعادته عشان يسعد غيره
صـاحـب الـقـلـب الـكـبـيـر المليان بحب الخير لكل الناس
اللي تعلمت منه الكثير وافادني في حياتي ولازلت استفيد
الانسـان اللي كان غير الناس اللي قـابلتهم في حياتي واعرف انه زي ما كان اول صديق بيكون آخـرصديق
لان مـا في مثله في هالدنيـا احد...


"صديقي الوحيد"
خالد العبدالعزيز

الله العالم بحالتـي بعدك يالغالي يـاليتـك هنـا عندي

وما راح انساك يـا رفيقي هو في احد يقدر ينسى مثلك؟!
ليتـك قبل ما رحت علمتني ويـن القى انسـان زيك!!
متأكد انك تدري اني دايم شاري ما ابيع
وتـقبـل اسفي البالغ على كل اللي صـار مني ...الوداع...
. . . .


اذا كنت تقرى قصتي وكان بينك وبين من تحبه مشكله وكنتوا بعـااد عن بعض ارسل له قصتي وارفقها بأعتذار بسيط دام عندك فرصه الحين..

[تآج الوقــآر]

لم أنته بعد.. لي عودة

جزاكـــ الله خيرا ..

["|دمعه متفائله|"]

تم قرات بداية القصه
لي عوده
مشكور

[احلام طفلة]

اعذرني القصة مكرره في المقهى الادبي

للاخت روز جوري

دمتــ

لك الشكــر كاملا

عذرا يغلق