أخيراً .. دخلت الحلاق .. وصرت مزيون ( صوره حديثه ) !

[مدمن شاهي]

سلام علاكم :)

الدنيا تبي .. والآخره تبي !

وإلى متى والواحد .. لايتزيّن .. ولايشخّص ... ولا يزبرق عمره !

وش فرقي عن ( دحيّم ) يوم انه يطقّ العقال المايل - مالت عليه بقعا - ولبس ثوب أبو سبعة أزارير فضيّه .. ولبس كنادر كعب عالي .. واعرس على الربشا !

وش فرقي عن ( علي ) ولد المنفهق .. يوم انه " حفّ " الشنب ... وضبّط الشعر .. وفتل حواجبه !

وش فرقي عن ( سمير ) ولد الساحر .. يوم انه يمرّ " البنشري " وياخذ منه شامبو " سيجنل تو " وفرشاة أسنان .. وصار كل ماشافني .. فتح خشّته عشان أشوف أسنانه تلامع !

وش فرقي عن هالناس اللي كل يوم رازّه عمرها .. وتمشي حبّه حبّه في الاسواق وعند مدارس الطالبات << أحلق حواجبي إذا صار لهم خوات في المدرسه !

اليوم .. ببشّركم ببشاره .. زرقت للحلاق .. ونطلت على العامل ( ثلاثه ريال ) متسلّفها من ( زيد المنزوي ) .. وقلت : شوف .. أضبط شعري .. أحلق الشين .. وخلّ الـــــــــزين ! ... ورّاني ( ثلاث صور ) << أحس أنها لناس مطلوبين :) ! .. قال [ تخيّر أي شكل تبي ] .. أخترت أملحهم .. ! .. قال ( سكّر عيونك ) .. سكّرت ... شوي عطاني وحده في رقبتي .. وقال ( أفتح ) .. فتحت عيوني .. شوي إلا واطقّها " ابتسامه " .. ماصدّقت اللي شفته !
( هذا أنــــا ) .. أذر المكياج يلعب دور ! :)
وانا اشوف حريمنا مابلا زيون ! .. أذر المكياج نعمه وانا ماندري ! :)

وبِما أنكم ناس غالين علي .. فاليوم بنزّل صورتي في جميع المنتديات .. وأشيل صورتي الأوّله .. لاتفشّلني قدّام المشرفين .. !
خلّني مزهلق .. وافتح النفس .. !
يكفي فشيله بشعري الأوّل .. ويكفي " احتقار " الزيون لي .. هاللي يشوفوني بطرف عيونهم - جعلها تفضخ - ! :)

أنا داري أني " بانتشر " في البلوتوث ... وبتصيرالناس تستغل صورتي في أمور ( دنيئه ) وحركات ( مُش ولابُد ) ! :) .. لكن تراي ماأحلل أحد إذا صار يستغلني في شي حرام !

من اليوم وطالع أبي كل من شاف صورتي في المنتديات .. يدلّي يستانس وينبسط .. !
أبي كل من دخل مواضيعي ( يجلس يطالع في صورتي ربع ساعه .. وفجأه .. وبِلا إراده يسيح على الطاوله ! ) :seko:

خلاص .. يكفي .. يكفي يامُدمن .. تراك قطعت قلبي :af8: !

عاد آلحين أترككم مع الزين ( مُدمن ! ) :


صورتي سابقاً [ قبل أروح للحلاق ] .. يعني يوم كنت شين :) :



http://vb.albashiri.net/image.php?u=3149&dateline=1145470258&type=profile
صورتي الحاليه [ يوم أني طلعت من الحلاق ] .. يعني يوم صرت زين :) :


http://vb.albashiri.net/image.php?u=3149&dateline=1150208579

هاه .. بشّروني أصلح أصير خوي أمير أو خوي مُستشار في الدوله ؟
أصلح أصير ( خلفية لسطح المكتب ) ؟
أصلح أصير ( صورة غلاف مجلّة فواصل ) ؟

هاه أصلح .. بشّروني تكفون .. تراي قاعد على أعصابي ؟ :ac7:

سلام

[بنت الفخر زايد]

ماشيء فرق

بينهن

[مدمن شاهي]

الصوره ماتطلع إلا بالضغط على الرابط .. !

شكل المنتدى رفض الصوره يا أنها تخدش الحياء .. أو أن (سستم المنتدى ) ارتاع !

يابختك ياحلاق .. خذت الثلاثه ريال .. ورحت ( أنا ) فيها !

[بارق الأمل]

ماشاء الله تبارك الله

حلاق متمكن حلق كل هالشعر..

على العموم نعيمك يا مدمن شااااااااااااهي ..

[ماجد]

هههههههههههه

حلاقة غير شكل

بس الكشة الي قدام ( الصدام) من وين طلعها لك

شكل الي كان ورى سحبه لك قدام خخخخخخخ

حلوة أمور زي النونو

بسم الله ما شاء الله

تجننننننننننننن >> بالمعنى الآخر

تحياتي

ماجد .,.,

[مدمن شاهي]

بنت الفخر زايد

وش لون يعني ؟ <<< وجه واحد مايبي يعرف الحقيقه ! :seko:

[عربي مسلم]

هلا مدمن

:)


نعيماً


وعقبال ما يرزقكـ الله خمسة ريال

وموووووووووووس

[عربي مسلم]

بس صورتكـ قبل الحلاقة أحلى

:seko::seko::seko::seko:

[نور]

بشّروني أصلح أصير خوي أمير أو خوي مُستشار في الدوله ؟
أصلح أصير ( خلفية لسطح المكتب ) ؟
أصلح أصير ( صورة غلاف مجلّة فواصل ) ؟

رب ّ كلـامات قالت لصاحبها دعني ..!
.. :) ..!
إن كان ولـابد ان نقول رأينا،
فكان في نظري ما كنت عليه أجمل ..!!
.

.

.

ننتظر موضوع جديدا ً ..
يحكي لنا ظهور ما حُلق لتعود تلك الصورة ..!

[مشاري الأول]

مبروووووك يامدمن شاهي



بعدين متحسف بثلاثة ريال؟؟ قلي اسلفك علطول<<<<مسوي ولد نعمة:af8:








تحياتي لكم:ac8:

[إشراقة شمس]

اخوي مدمن ياترى ايش مغزى موضوعك؟؟

هل وراءه فائدة ،، مثلا هل تريد الاشارة الى حال الشباب الي يتزينون ويتمكيجون كانهم نسوان

ولا ايش المقصد بالضبط ؟؟؟


لانه ماالاحظ في مواضيعك الا ضحك وسوالف ولااستطيع تتبع المغزى والمفيد الي بيها ياليت تفيدني

لك الشكر

[~MEMA|]

بصراحه لو ما دفعت احسن .. خسرت فلوسك على ولا شي .. :as1:


ابي اعرف بس .. ربعك من وين عرفتهم ؟؟؟ دحيم , ولد المنفهق:af6:

[مدمن شاهي]

جواب يمزع بنفسه في الموضوع رداً على سؤال أختنا : إشراقة شمس

أعتقد أنك عرفتي المغزى في مضمون كلماتك .. وثقي تمام الثقه أن جميع مواضيعي لها ( معنى ) لكن مايعرف المغزى من حروف ( مدمن شاهي ) إلا من دقق في كلماته !

شكراً لحضورك ..

[بنت الصديق]

الحمدلله اخي مدمن انه حروفك تحمل من الابداع ما لا تحمله صورتك <<< وش فيها الصورة << ما تقصد شي :seko:

اسال الله الهداية لكل من لديه عقل ,,, ويهدي الامة لما يحب ويرضى

الصور والاشكال ما عادت تنفع ابد ... تستطيع ان تحمل ما شئت من صورة في شكلك لكنك لا تستطيع ان تعكس الخارج على الداخل ,,,

قد ينعكس الباطن على الظاهر لكن العكس ليس صحيح

ولكـ سلامي معـ التحية

[مدمن شاهي]

بارق الأمل

قلت له يكمّل على شعر الأذن .. لكن ( صرّفني ) وقال : قم تراه أذّن :)

شكراً لحضورك ..

[خجل]

والله شكلك نتفت شعرتين و جيت !!

عموماً >>> نعيماً ..

[.. المشاكس ..]

طالع قمر وانا اخوك ..

وش الزين ذا ..

بس ابي اعرف هو قص شعرك بمقص اكيد !!

لان الشعر ناعمره وياثر عليه المقص ..

هع هع ..

سيكو ..

^ـ^

[وحيدة في القمر]

ماشاء الله ...على البركه...حلقت كشتك....تعال اعطيك كف حلاقه...
____________
اما عليك اسماء اصدقاء......حشى مو اسماء...صارت كنها جمله مفيده...
زيد المنزوي.....وعلي المنفهق...ورويشد المندلق....ودحيم المنكب......

[@عبود@]

السلام عليكم ورحمة الله وبركاته
انا على طول حطيت الصوره خلفيه
ومبروك
ننتظر جديدك

[براءة الأطفال]

ههههههههههه

أضحك الله سنك

^_^

[مدمن شاهي]

ماجد

والله ورفعت معنوياتي :) ...

شكراً لك ..

[هيـــــام]

ولا تزعل اخوى

بسلفك ثلاثة ريال بس احلق مرة تانية

لكن مدرى اصورة افزعتنى

[مياده]

اضحك الله سنك
طريقه طرح رائعه ومضحكه اخي
بارك المولى فيك

[مدمن شاهي]

عربي مسلم

ياخي أنت ماتعرف ترد مرّه وحده ؟ :) !

لازم كل شوي تكتب رد .. شكلك تقرا سطر ثم ترد .. ثم تقرا السطر الثاني ثم ترد مره ثانيه :) ! .. خخخخ !

عالعموم .. حلاقة ( أبو خمسه ) فكّني منها .. واللي فيني كافيني ! :)

شكراً لك يابعدي